Хятадын Chang’e-6 аппаратаар Сарны алс талаас авчирсан хөрсний дээжийг судлах явцад эрдэмтэд γ-Fe буюу гамма төмөр хэмээх төмрийн ховор талст бүтцийг байгалийн сарны дээжээс анх удаа илрүүлжээ.
Судалгаагаар γ-Fe нь Сарны гадаргуу дээрх жижиг хэмжээний цохилтын шилэн хэсгүүдийн дотор нанометрийн хэмжээтэй тоосонцор хэлбэрээр хадгалагдсан болохыг тогтоосон байна. Уг нээлтийг Хятадын Шинжлэх ухааны академийн Хэфэй дэх Физикийн шинжлэх ухааны хүрээлэнгийн судлаачид хийжээ.
Эрдэмтдийн хувьд хамгийн сонирхолтой нь γ-Fe-ийн зарим тоосонцор тогтвортой соронзон “эргүүлэг” төлөв үүсгэж чаддаг болохыг илрүүлсэн явдал юм. Ийм шинж нь тухайн хэсэгт эрт үед байсан Сарны соронзон орчны талаарх мэдээллийг хадгалсан байж болзошгүйг харуулж байна.
Сар өнөөдөр дэлхийтэй адил дэлхийн хэмжээний соронзон оронгүй боловч эрт үедээ соронзон оронтой байсан гэх нотолгоо бий. Тиймээс шинэ олдвор нь Сарны эртний соронзон орон хэрхэн үүсэж, цаг хугацааны явцад хэрхэн өөрчлөгдсөнийг судлахад шинэ боломж нээж болзошгүй юм.
Судалгааны үр дүн Proceedings of the National Academy of Sciences (PNAS) сэтгүүлд есдүгээр сарын 16-нд нийтлэгдсэн байна.
