2026 оны өвлийн Монгол хэл, бичгийн болон элсэлтийн шалгалтын бүртгэл өнөөдөр буюу 10 дугаар сарын 1-ний 09:00 цагт орон даяар эхэллээ.
Бүртгэл 11 дүгээр сарын 23-ны 18:00 цагт дуусах бөгөөд шалгуулагчид Элсэлтийн шалгалтын цахим бүртгэлийн систем-ээр бүртгүүлэх юм.
Бүртгүүлэхдээ дараах зүйлсийг анхаарна уу.
Шалгуулагч өөрийн и-мэйл хаягийг ашиглан бүртгүүлнэ. Бүртгэлийн дугаар болон нууц үг тухайн и-мэйл хаягт илгээгдэнэ.
3х4 хэмжээтэй цээж зургийг файлаар оруулах бөгөөд шаардлага хангаагүй зураг устгагдахыг анхааруулжээ.
Элсэлтийн шалгалтаар монгол хэл, англи хэл, орос хэл, математик, физик, хими, биологи, газар зүй, түүх, нийгэм судлал хичээлүүдээс хоёроос дээш хичээл сонгон бүртгүүлнэ.
Монгол хэл, бичгийн болон элсэлтийн шалгалтын нэг хичээлийн төлбөр 20 мянган төгрөг байна.
Бүртгэлийн хугацаанд шалгалт өгөх хичээлээ сонгож, төлбөрөө төлсөн тохиолдолд бүртгэл баталгаажна.
Хөгжлийн онцлогтой иргэн шалгалтад бүртгүүлсэн бол холбогдох баримт бичиг, тухайлбал өргөдөл болон эмчийн магадалгааг бүртгэлийн хугацаанд Боловсролын үнэлгээний төвд хүргүүлэх шаардлагатай.
БҮТ-ийн цахим бүртгэлийн системд шалгуулагчид бүртгэлээ шалгах, бүртгэлийн хуудсаа хэвлэх болон шалгалтын хичээлээ сонгох боломжтой байна.
