АНУ-ын Ерөнхийлөгч Дональд Трампын тав дахь бөгөөд хамгийн отгон хүүхэд Баррон Уильям Трамп сүүлийн үед зөвхөн “Ерөнхийлөгчийн хүү” гэдгээрээ бус, бизнес, криптовалютын салбар болон улс төрийн нөлөөгөөрөө олон улсын хэвлэлүүдийн анхаарлыг татах болсон нэгэн болоод байна.
Баррон Трамп 2006 оны гуравдугаар сарын 20-нд Нью-Йорк хотод төрсөн. Тэрбээр Дональд Трамп болон АНУ-ын тэргүүн хатагтай Мелания Трамп нарын цорын ганц хамтын хүүхэд юм. Харин аавынхаа өмнөх гэрлэлтээс төрсөн Дональд Трамп Жуниор, Иванка Трамп, Эрик Трамп, Тиффани Трамп нарын дүү нь билээ.
2017 онд Дональд Трамп АНУ-ын Ерөнхийлөгчөөр анх сонгогдох үед Баррон ердөө 10 настай байсан юм. Тухайн үед тэрбээр ээжийнхээ хамт хэсэг хугацаанд Нью-Йорк хотод амьдарч байгаад Цагаан ордонд нүүж очсон бөгөөд АНУ-ын төрийн тэргүүний ордонд хүүхэд насаа өнгөрүүлсэн цөөн хүмүүсийн нэг болсон юм.
Гэсэн ч Барроны амьдрал ах, эгч нарынхаас нь эрс ялгаатай байв. Дональд Трамп Жуниор, Иванка, Эрик Трамп нар багаасаа гэр бүлийн бизнес, улс төрийн үйл ажиллагаанд идэвхтэй оролцож, хэвлэл мэдээллийн байнгын анхаарлын төвд байсан бол Мелания Трамп хүүгээ олон нийтийн хэт их анхаарлаас хол байлгахыг эрмэлздэг байсан гэж хэвлэлүүд онцолдог.
Тиймээс Баррон Трамп бага насандаа ярилцлага бараг өгдөггүй, олон нийтийн арга хэмжээнд ховор оролцдог, харьцангуй нууцлаг амьдралтай байжээ.
БОЛОВСРОЛ БА ОЛОН НИЙТИЙН АНХААРАЛ
Баррон Нью-Йорк болон Флоридад суралцаж, 2024 онд Флорида мужийн Уэст-Палм-Бич дэх ахлах сургуулиа төгссөн байна. Улмаар Нью-Йорк хотод их сургуульд суралцах болсон талаар мэдээлэгдсэн юм.
Түүний өндөр мөн олон нийтийн анхаарлыг байнга татдаг. 2 метр орчим өндөртэй гэж мэдээлэгддэг Баррон аав Дональд Трампаасаа ч өндөр харагддаг бөгөөд олон нийтийн арга хэмжээнд гэр бүлийнхнийхээ хажууд зогсоход нь энэ нь илүү тод анзаарагддаг.
Гэвч түүнийг зөвхөн өндөр нуруу, алдартай гэр бүлээр нь тодорхойлох үе өнгөрч эхэлжээ.
ААВДАА ЗАЛУУ ҮЕИЙН “ХЭЛ”-ИЙГ ОЙЛГУУЛСАН УУ?
2024 оны АНУ-ын Ерөнхийлөгчийн сонгуулийн кампанит ажлын үеэр Баррон Трампын нэр дахин олны анхааралд орсон юм.
Тухайн үед Дональд Трамп залуу сонгогчдод хүрэхийн тулд уламжлалт телевизийн ярилцлагаас гадна подкаст, цахим платформ, олон сая дагагчтай контент бүтээгчдэд илүү анхаарал хандуулсан. Энэ стратегид Баррон тодорхой хэмжээгээр нөлөөлсөн байж болзошгүй тухай олон улсын хэвлэлүүд мэдээлж байв.
Тухайлбал, Дональд Трамп өөрөө хүүгээ зарим нөлөө бүхий подкаст хөтлөгч, цахим орчны хүмүүстэй холбогдох талаар зөвлөж байсан гэж ярьж байсан удаатай.
Өөрөөр хэлбэл, Баррон улс төрийн тайзан дээр үг хэлдэггүй ч залуу үеийн мэдээлэл авах арга барил, цахим орчны соёлыг аавынхаа багт ойлгуулахад тодорхой үүрэг гүйцэтгэсэн гэх үнэлгээ гарчээ.
КРИПТО ЕРТӨНЦӨД ОРЖ ИРСЭН НЬ
Баррон Трампын нэр хамгийн сүүлийн үеийн мэдээллүүдэд криптовалютын World Liberty Financial төсөлтэй холбогдон гарах болсон.
Трампын гэр бүлийнхэнтэй холбоотой энэхүү крипто төсөл нь АНУ-ын улс төр, бизнес, санхүүгийн салбарт анхаарал татсан сэдвүүдийн нэг болжээ. Барроныг тус төслийн эхний шатны санаачлагчдын нэг байсан талаар мэдээлдэг бөгөөд криптовалютын талаар гэр бүлийнхнээсээ илүү сонирхолтой байсан гэх яриа ч бий.
Түүний хөрөнгийг 150 сая ам.доллар орчимд хүрсэн гэж зарим хэвлэл тооцсон нь олны анхаарлыг улам татсан юм.
Гэхдээ энэхүү дүн нь албан ёсны хөрөнгө орлогын мэдүүлэг бус, крипто хөрөнгө болон бизнесийн эзэмшлийн үнэлгээнд үндэслэсэн тооцоо гэдгийг онцлох шаардлагатай.
Криптовалютын зах зээлийн үнэ байнга хэлбэлздэг учраас Барроны бодит хөрөнгө хэд болохыг нарийн тогтоох боломжгүй юм.
ТРАМПЫН ГЭР БҮЛИЙН ДАРААГИЙН ҮЕ
Баррон Трампын ирээдүй одоогоор хамгийн их сонирхол татсан асуултуудын нэг хэвээр байна.
Тэрбээр аав шигээ улс төрд орох уу, ах нарынхаа адил гэр бүлийн бизнесийг удирдах уу, эсвэл криптовалют, технологийн салбарт өөрийн гэсэн замналаа бий болгох уу гэдэг нь тодорхойгүй байна.
Гэхдээ нэг зүйл тодорхой болсон нь Баррон Трамп одоо зөвхөн “Дональд Трампын отгон хүү” гэх тодотголтой нэгэн биш болж эхэлжээ.
Цагаан ордонд хүүхэд насаа өнгөрүүлсэн, дэлхийн хамгийн их анхаарал татдаг улс төрийн гэр бүлийн нэгэнд өссөн тэрбээр өдгөө бизнес, технологи, криптовалютын ертөнцөд өөрийн гэсэн байр сууриа бий болгох алхмуудыг хийж эхэлсэн гэх мэдээлэл олны анхаарлыг татаж байна.
Хэдийгээр тэр олон нийтэд бараг ярилцлага өгдөггүй, хувийн амьдралаа нууцалсан хэвээр байгаа ч ирэх жилүүдэд Трампын гэр бүлийн дараагийн үеийн хамгийн сонирхолтой төлөөлөгчдийн нэг нь Баррон Трамп байх магадлал өндөр гэж ажиглагчид үзэж байна.
