Америкийн дуучин Kelly Clarkson хиймэл оюун ухааныг уран бүтээлд ашиглахыг эсэргүүцдэггүй ч AI-аар бүтээсэн уран бүтээлчид хүний дуучидтай нэг хөгжмийн чарт дээр өрсөлдөх ёсгүй гэж үзэж байгаагаа илэрхийллээ.
Тэрээр Bowen Yang, Matt Rogers нарын хөтөлдөг “Las Culturistas” подкастын есдүгээр сарын 30-ны дугаарт оролцох үеэрээ AI-ийн талаар байр сууриа хуваалцжээ. Clarkson өөрийгөө хиймэл оюун ухааныг сонирхдог, тэр дундаа уран бүтээлийн зориулалтаар ашиглахад дуртай гэдгээ хэлсэн байна.
Гэхдээ түүний хувьд асуудал нь AI уран бүтээлчид хүний уран бүтээлчидтэй адилхан хөгжмийн чартын өрсөлдөөнд орох үед эхэлдэг аж. Тиймээс AI-аар бүтээсэн хөгжмийн бүтээлүүдэд зориулсан тусдаа чарт бий болгох санал гаргасан байна.
Clarkson үүнийг спортын тэмцээнтэй зүйрлэж, хүн болон роботыг нэг төрөлд өрсөлдүүлэхтэй адил гэж тайлбарлажээ.
Тэрээр мөн AI нь хөгжмийн салбарт шинэ боломж нээж, өмнө нь тодорхой зүйлсийг хийж чаддаггүй байсан хүмүүст уран бүтээл хийх боломж олгож болохыг онцолсон байна. Харин хүний уран бүтээлийн онцлог, оролцоог алдахгүй байх нь чухал гэж үзэж байгаа аж.
Сонирхолтой нь Clarkson өөрөө AI технологийг өдөр тутам ашигладаг бөгөөд подкастын үеэр ChatGPT-ийг гэрийн интерьерийн санаа, дизайны ажилд ашигладаг тухайгаа ярьсан байна.
Ийнхүү түүний байр суурь нь “AI-г хориглох бус, хүний уран бүтээлээс тусад нь авч үзэх” гэсэн санааг дэвшүүлж буйгаараа хөгжмийн салбар дахь хиймэл оюун ухааны маргааныг дахин анхаарлын төвд орууллаа.
Эх сурвалж: Entertainment Weekly
