Хятад улс сүүлийн жилүүдэд эрчимтэй хөгжсөн хоол хүргэлтийн салбар дахь “хий үзэгдлийн гал тогоо” буюу зөвхөн хүргэлтээр үйлчилдэг, бодит байршил болон үйл ажиллагааны мэдээлэл нь тодорхойгүй газруудтай тэмцэх томоохон арга хэмжээг эхлүүлээд байна.
Хятадын Зах зээлийн зохицуулалтын ерөнхий газар (SAMR) энэ онд онлайн хоол хүргэлтийн салбарт өргөн хүрээний шалгалт явуулж, хэрэглэгчдийн аюулгүй байдалд эрсдэл учруулж болзошгүй олон мянган зөрчил илрүүлжээ. Шалгалтаар зарим платформууд хоол үйлдвэрлэгчдийн тусгай зөвшөөрөл, хаяг байршил, үйл ажиллагааны мэдээллийг хангалттай нягтлаагүй нь тогтоогдсон байна.
“Хий үзэгдлийн гал тогоо” гэдэг нь хэрэглэгчдэд онлайн орчинд ресторан мэт харагддаг ч бодит байршилгүй, эсвэл бүртгэлтэй хаяг дээрээ үйл ажиллагаа явуулдаггүй хүргэлтийн үйлчилгээний газруудыг хэлдэг. Зарим нь нэг гал тогооноос хэд хэдэн өөр нэрийн ресторан ажиллуулж, хэрэглэгчдэд бодит мэдээлэл өгдөггүй ажээ.
Хятадын эрх баригчид шинэ журмын хүрээнд зөвхөн хүргэлтээр үйлчилдэг газруудыг платформ дээрээ тусгай тэмдэглэгээтэй байлгах, бодит хаяг болон тусгай зөвшөөрлийн мэдээллээ ил тод харуулахыг үүрэг болгосон байна. Мөн платформууд худалдаа эрхлэгчдийн бүртгэл, зөвшөөрлийг газар дээр нь шалгаж баталгаажуулах шаардлагатай болжээ.
Шалгалтын үр дүнд Хятадын долоон том цахим худалдаа, хүргэлтийн платформд нийт 3.6 тэрбум юанийн торгууль ногдуулсан бөгөөд эрх баригчид 67 мянга гаруй хууль бус “хий үзэгдлийн дэлгүүр”, гал тогооны сүлжээг илрүүлсэн талаар мэдээлжээ.
Энэхүү арга хэмжээ нь дэлхийн хамгийн том хоол хүргэлтийн зах зээлүүдийн нэг болох Хятадад хүнсний аюулгүй байдлыг сайжруулах, хэрэглэгчдийн итгэлийг сэргээх зорилготой юм. Мэргэжилтнүүдийн үзэж буйгаар хоол хүргэлтийн үйлчилгээ хурдацтай өсөхийн хэрээр хяналт, зохицуулалтыг ч мөн адил боловсронгуй болгох шаардлага үүсээд байна.
