Өглөө сэрүүлгээ дахин дахин “snooze” хийж унтах зуршил олон хүнд байдаг. Гэвч нойр судлаачдын үзэж буйгаар энэ дадал нь бие организмд бодсоноос илүү сөрөг нөлөө үзүүлдэг аж.
Сэрүүлэг анх дуугарах үед тархи сэрэх процессоо эхлүүлдэг ч дахин унтахад бие организм будилж, “сэрсэн ч биш, унтсан ч биш” байдалд ордог байна. Үүнийг мэргэжилтнүүд “sleep inertia” буюу нойрны манарал гэж нэрлэдэг бөгөөд энэ үед хүн өдөржин ядруу, анхаарал төвлөрөхгүй, уур бухимдалтай байх хандлагатай болдог аж.
Мөн сэрүүлэг олон дахин дуугарах бүрт зүрхний цохилт, стрессийн даавар болох кортизолын түвшин огцом өөрчлөгдөж, мэдрэлийн системд ачаалал өгдөг байна. Тасалдсан богино хугацааны нойр нь биеийг амрааж чаддаггүй бөгөөд нойрны чанарыг улам дордуулдаг талаар эмч нар анхааруулжээ.
Түүнчлэн тархи “эхний сэрүүлэг чухал биш” гэж дасах хандлага үүсдэг учир өглөө босох улам хэцүү болдог байна. Ийм зуршил удаан үргэлжилбэл ажлын бүтээмж буурах, анхаарал сулрах, сэтгэл санааны тогтворгүй байдал үүсэх эрсдэлтэй аж.
Нойр судлаачид:
нэг л сэрүүлэг тавих,
сэрүүлгээ орноосоо хол байрлуулах,
өдөр бүр ижил цагт унтаж, сэрэх,
7-9 цагийн бүтэн нойр авах
зэрэг дадлыг хэвшүүлэхийг зөвлөж байна.
Мэргэжилтнүүдийн хэлж буйгаар чанартай нойр нь зөвхөн амралт биш, хүний бие болон тархины хэвийн үйл ажиллагааны үндэс болдог тул өглөөний сэрүүлгийн буруу зуршлаа өөрчлөх нь эрүүл мэнддээ оруулж буй чухал хөрөнгө оруулалт юм.
