Улсын Их Хурлын 2026 оны хаврын ээлжит чуулганы хүрээнд өнөөдөр буюу зургаадугаар сарын 17-ны өдөр байнгын хороод болон ажлын хэсгүүд хуралдаж, татварын багц хуулийн өөрчлөлт, нийгмийн даатгалын тогтолцоо, эмнэлгийн тусламж үйлчилгээ, уур амьсгалын өөрчлөлт зэрэг нийгэм, эдийн засгийн ач холбогдол бүхий асуудлуудыг хэлэлцэхээр төлөвлөжээ.
Өдрийн эхэнд Хүний хөгжил, нийгмийн бодлогын байнгын хорооны ажлын хэсэг хуралдаж, Сургуулийн орчны эрүүл мэнд, аюулгүй байдлын тухай хуулийн төслийг хэлэлцүүлэгт бэлтгэх асуудлыг авч хэлэлцэнэ. Мөн Хүүхдийн хөгжлийг дэмжих тухай хуулийн төслийн ажлын хэсэг тус тус хуралдах юм.
Түүнчлэн Байгаль орчин, хүнс, хөдөө аж ахуйн байнгын хороо Хот суурин газрын ногоон байгууламжийн тухай хуулийн төслийн талаар хэлэлцэх бол Малчны тухай хуулийн хэрэгжилтэд зориулсан ерөнхий хяналтын сонсголын бэлтгэл ажлыг хангах ажлын хэсэг мөн хуралдана.
Төсвийн байнгын хороо татварын багц хуулийн төслүүдийг эцэслэн хэлэлцэнэ
Төсвийн байнгын хороо 11:00 цагаас хуралдаж, татварын багц хуулийн төслүүдийн эцсийн хэлэлцүүлгийг хийхээр товложээ.
Үүнд:
Татварын ерөнхий хуульд нэмэлт, өөрчлөлт оруулах тухай төсөл
Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай төсөл
Хувь хүний орлогын албан татварын тухай хуульд нэмэлт, өөрчлөлт оруулах тухай төсөл
Нэмэгдсэн өртгийн албан татварын тухай хуульд нэмэлт, өөрчлөлт оруулах тухай төсөл
Тамхины хяналтын тухай хуультай холбоотой дагалдах хуулийн төслүүдийг тус тус хэлэлцэх юм.
Чуулганы нэгдсэн хуралдаанаар парламентын үйл ажиллагаатай холбоотой хуулийн төслүүдийг хэлэлцэнэ
УИХ-ын нэгдсэн чуулган 14:00 цагаас хуралдаж, парламентын үйл ажиллагаа, хяналт шалгалтын тогтолцоог боловсронгуй болгох зорилготой гурван хуулийн төслийн анхны хэлэлцүүлгийг үргэлжлүүлнэ.
Тодруулбал:
Монгол Улсын Их Хурлын тухай хуульд нэмэлт, өөрчлөлт оруулах тухай төсөл
УИХ-ын чуулганы хуралдааны дэгийн тухай хуульд нэмэлт, өөрчлөлт оруулах тухай төсөл
Монгол Улсын Их Хурлын хяналт шалгалтын тухай хуульд нэмэлт, өөрчлөлт оруулах тухай төслүүдийг хэлэлцэхээр төлөвлөжээ.
Нийгмийн даатгал, эмнэлгийн үйлчилгээний шинэчлэлийн асуудлыг хэлэлцэнэ
Хүний хөгжил, нийгмийн бодлогын байнгын хороо 15:00 цагаас хуралдаж, Тамхины хяналтын тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийхээс гадна Эмнэлгийн тусламж, үйлчилгээний тухай хуулийн шинэчилсэн найруулгын төслийг хэлэлцэх эсэхийг шийдвэрлэнэ.
Мөн Засгийн газар болон УИХ-ын гишүүдээс өргөн мэдүүлсэн Нийгмийн даатгалын ерөнхий хуульд нэмэлт, өөрчлөлт оруулах хоёр төслийг хэлэлцэх эсэх асуудлыг авч үзэхээр төлөвлөсөн байна.
Уур амьсгалын өөрчлөлт, ойн тухай хуулийн төслүүдийг хэлэлцэнэ
Байгаль орчин, хүнс, хөдөө аж ахуйн байнгын хороо 16:00 цагт хуралдаж, Уур амьсгалын өөрчлөлтийн тухай хуулийн төслийн анхны хэлэлцүүлгийг хийх юм.
Мөн Ойн тухай хуулийн шинэчилсэн найруулгын төслийг хэлэлцэх эсэх асуудлыг хэлэлцэхээс гадна Хүнсний тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийхээр төлөвлөжээ.
Маргаашийн хуралдаануудаар татварын тогтолцоо, нийгмийн хамгаалал, эрүүл мэндийн үйлчилгээ, байгаль орчны бодлоготой холбоотой хэд хэдэн чухал хуулийн төслийн хувь заяа шийдэгдэхээр байна.
