АНУ-ын Теннессид цаазаар авах ял сонссон 50 настай Криста Пайкийг үхлийн тариагаар цаазлах ажиллагаа хоёр удаа бүтэлгүйтэж, тэрбээр амьд үлджээ.
Пайкийг есдүгээр сарын 30-ны орой Нэшвилл хот дахь Riverbend Maximum Security Institution-д цаазлахаар төлөвлөсөн байна. Албаныхан түүнд үхлийн тарианы хоёр тун пентобарбитал хийсэн боловч тэр нас бараагүй бөгөөд ажиллагааг зогсоожээ. Улмаар Пайкийг эмнэлэгт хүргэсэн бөгөөд өмгөөлөгчдийнх нь мэдээлснээр биеийн байдал нь хүнд, амь насыг нь аврах эмчилгээ хийж байгаа аж.
Гэрчүүдийн мэдээлснээр тариа хийлгэсний дараа Пайк ухаантай хэвээр байсан бөгөөд гар нь өвдөж байгаа талаар хэлсэн байна. Хоёр дахь тунг хийсний дараа ч амьсгалж байсан нь сонсогдож байжээ.
Пайк 1995 онд 18 настай байхдаа 19 настай Коллин Слеммерийг хөнөөсөн хэрэгт цаазаар авах ял сонссон юм. Тэрбээр цаазын ял сонссон үедээ АНУ-ын орчин үеийн цаазын ялын түүхэн дэх хамгийн залуу эмэгтэй хоригдол болсон байна.
Энэхүү хэрэг нь Теннессид энэ онд цаазаар авах ажиллагаа бүтэлгүйтсэн хоёр дахь тохиолдол болж байна. Мужийн захирагч Билл Ли үлдсэн цаазаар авах ажиллагааг 2026 оны дуустал хойшлуулж, болсон явдлыг гуравдагч талын оролцоотойгоор иж бүрэн шалгуулахаар болжээ.
Теннессигийн Хорих байгууллагын газраас ажилтнууд мужийн баталсан цаазын ажиллагааны журмыг бүхэлд нь мөрдсөн гэж мэдэгдсэн бөгөөд юуны улмаас хоёр тун тариа үр дүнд хүрээгүй талаарх албан ёсны тайлбар одоогоор гараагүй байна.
Пайкийн хэрэг ийнхүү АНУ-д цаазаар авах ялын аргачлал, үхлийн тарианы найдвартай байдал болон ажиллагааны журмын талаар дахин анхаарал татсан байна.
