Холливудын нэрт жүжигчин Эван МакГрегор Монгол охин Жамьяныг үрчилж авсан түүх нь түүний амьдралын хамгийн чухал үйл явдлуудын нэг гэж үздэг. Тэрбээр энэ талаар олон жилийн турш бараг ярилцлага өгөөгүй ч 2020 онд гарсан Apple TV+-ийн Long Way Up баримтат цувралд анх удаа дэлгэрэнгүй дурссан юм.
Монголд хийсэн аялал амьдралыг нь өөрчилжээ
2004 онд Эван МакГрегор өөрийн найз Чарли Бурмантай хамт "Long Way Round" мотоциклийн дэлхийг тойрсон аяллаа хийх үеэр Монголд ирсэн байна. Аяллынхаа үеэр тэд Улаанбаатар хотын хүүхдийн асрамжийн төвд зочилж, тэнд дөрвөн настай Жамьянтай анх уулзжээ.
Хожим МакГрегор энэ мөчийг эргэн дурсахдаа:
"Тэр өдрөөс хойш би тэр бяцхан охины тухай бодохоо больж чадаагүй."
хэмээн ярьсан байдаг.Хоёр жилийн дараа албан ёсоор үрчилж авчээ
Монголоос буцсаны дараа Эван МакГрегор болон тухайн үеийн эхнэр, продюсер Ив Мавракис нар олон улсын үрчлэлтийн хууль, журмын дагуу шаардлагатай бүх бичиг баримтыг бүрдүүлж, бараг хоёр жилийн дараа буюу 2006 оны дөрөвдүгээр сард Жамьяныг албан ёсоор үрчилж авчээ. Тухайн үед Жамьян дөрвөн настай байсан юм.
"Хэрэв бид өөр замаар явсан бол түүнтэй хэзээ ч уулзахгүй байх байсан"
Long Way Up баримтат кинонд МакГрегор аяллынхаа үеэр Монголыг дайрах эсэх дээр эргэлзэж байсан тухайгаа ярьжээ.
Тэрээр:
"Хэрэв бид өөр замыг сонгосон бол Жамьянтай хэзээ ч уулзахгүй байх байсан. Амьдралд бүхнийг өөрчилдөг мөч гэж байдаг. Миний хувьд энэ бол тийм мөч байсан."
хэмээн сэтгэл догдлон өгүүлсэн байна.
Эван МакГрегор Жамьяныг үрчилж авсныхаа дараа түүнийг аль болох хэвийн орчинд өсгөхийг зорьж, хувийн амьдралыг нь олон нийтээс хамгаалсаар ирсэн. Гэсэн ч Жамьян аавтайгаа хамт 2019 онд "Doctor Sleep" киноны нээлт, 2024 онд Hollywood Walk of Fame-ийн од гардуулах ёслол, 2025 оны Critics Choice Awards зэрэг цөөн хэдэн арга хэмжээнд оролцсон юм.
Өдгөө Жамьян АНУ-д амьдарч байгаа бөгөөд эрүүгийн эрх зүйн чиглэлээр суралцаж, эмэгтэйчүүдийн эрхийн асуудлаар идэвхтэй ажилладаг гэж олон улсын хэвлэлүүд мэдээлжээ. Эван МакГрегор түүнийг ирээдүйд хүн амины хэргийн мөрдөгч болох хүсэлтэй талаар ч ярьсан байна.
эх сурвалж: people.com
