Францын нийслэл Парис хот өнөөдөр /2026.07.31/ Европын усан спортын аварга шалгаруулах 38 дахь удаагийн тэмцээнийг хүлээн авч, тивийн шилдэг тамирчдын өрсөлдөөн албан ёсоор эхэлж байна. Тэмцээн наймдугаар сарын 16-ныг хүртэл үргэлжлэх бөгөөд 2024 оны олимпын дараах Европ тивийн хамгийн том усан спортын арга хэмжээнд тооцогдож байна.
Энэ удаагийн тэмцээний онцлог нь 2024 оны Парисын олимпын наадамд ашигласан Olympic Aquatic Centre болон Сена мөрний усан замыг дахин ашиглаж буй явдал юм. Ингэснээр олимпын өвийг урт хугацаанд ашиглах Францын бодлогын нэгэн томоохон жишээ болж байна.
Европын усан спортын холбооны зохион байгуулж буй аварга шалгаруулах тэмцээн нь дараах таван төрлөөр аваргуудаа тодруулна.
Уран сэлэлт (долдугаар сарын 31 – наймдугаар сарын 5)
Усанд үсрэлт (долдугаар сарын 31 – наймдугаар сарын 6)
Ил задгай усны сэлэлт (наймдугаар сарын 4–8)
Өндрөөс усанд үсрэлт (наймдугаар сарын 7–8)
Усан сэлэлт (наймдугаар сарын 10–16)
Эхний өдөр уран сэлэлт болон усанд үсрэлтийн тэмцээнүүд эхэлж байгаа бөгөөд Испани, Итали, Их Британи, Франц, Герман зэрэг усан спортын хүчирхэг багууд аваргын төлөө өрсөлдөнө. Мөн олимп, дэлхийн аваргын медальт олон тамирчин Парист дахин хүч сорихоор хүрэлцэн ирээд байна.
2026 оны Европын аварга нь тус тэмцээний 38 дахь удаагийнх бөгөөд Европын усан спортын холбоо байгуулагдсаны 100 жилийн ойтой давхцаж буйгаараа онцлог юм. Парис хот ийнхүү 1931 оноос хойш хоёр дахь удаагаа энэхүү нэр хүндтэй тэмцээнийг зохион байгуулж байна.
Түүнчлэн зохион байгуулагчид энэ жилийн тэмцээнд тогтвортой хөгжлийн бодлогыг түлхүү хэрэгжүүлж, дахин ашиглах боломжтой тоног төхөөрөмж, хог хаягдлыг ангилан боловсруулах систем, нүүрстөрөгчийн ялгарлыг бууруулах арга хэмжээг цогцоор нь хэрэгжүүлэхээ мэдэгджээ.
Парисын Европын аварга шалгаруулах тэмцээн нь 2028 оны Лос-Анжелесын олимпын өмнөх хамгийн чухал сорилтуудын нэг бөгөөд тивийн шилдэг тамирчдын форм, өрсөлдөөний түвшинг тодорхойлох гол индэр болох төлөвтэй байна.
эх сурвалж: Paris Jetime
